အသစ်ဆောက်လုပ်တော့မည့် ပဏ္ဍိတာရာမ ဆစ်ဒနီသာသနာ့ရိပ်သာစီမံကိန်း

ဩစတေးလျနိုင်ငံ ဆစ်ဒနီမြို့၌တည်ရှိသော ပဏ္ဍိတာရာမသာသနာ့ရိပ်သာအောင်မြေကို ကောဇာသက္ကရာဇ် ၁၃၆၁ ခု၊ တပို့တွဲလဆန်း ၂ရက်၊ ခရစ်သက္ကရာဇ် ၂၀၀၀ ခုနှစ်၊ ဖေဖော်ဝါရီ ၆ရက် တနင်္ဂနွေနေ့တွင် ဆရာတော်အရှင်ပညာသာမိ(အောင်စည်ဆရာတော်)က မျိုးစေ့ချတည်ထောင်နိုင်ခဲ့ပြီး အနန္တ ကျေးဇူးတော်ရှင် ပဏ္ဍိတာရာမရွှေတောင်ကုန်းဆရာတော်ဘုရားကြီးက ချီးမြှောက်ဖွင့်လှစ်ပေးတော်မူခဲ့ပါတယ်။ထိုအချိန်မှစတင်ကာ ဝိပဿနာတရားစခန်း၊ မေတ္တာတရားစခန်း၊ ဗုဒ္ဓယဉ်ကျေးမှုအခြေပြုသင်တန်း၊ တရားပွဲများနှင့် သာရေးနာရေးကိစ္စအဝဝတို့ကို ဒကာဒကာမများ၏ ထောက်ပံ့လှူဒါန်းမှု ပစ္စယာနုဂ္ဂဟဖြင့် ကြိုးစားဆောင်ရွက်ခဲ့ကြပါတယ်။

ဆောက်လုပ်တော့မည့်စီမံကိန်း (၄)ရပ်

လက်ရှိအသစ်ဆောက်လုပ်တော့မည့် ပဏ္ဍိတာရာမဆစ်ဒနီသာသနာ့ရိပ်သာတော်ကြီးကို Place of Public Worship အဖြစ်သက်ဆိုင်ရာမှ ခွင့်ပြုချက်ရရှိခဲ့ပြီးဖြစ်လို့ ၅ ဧကခန့်ကျယ်ဝန်းသည့် ပဏ္ဍိတာရာမဆစ်ဒနီသာသနာ့ရိပ်သာ သာသနာ့အောင်မြေပေါ်တွင် –
၁။ဓမ္မာရုံ၊
၂။သိမ်တော်ကြီး၊
၃။ဆွမ်းစားဆောင်၊
၄။ကားရပ်နားစခန်း(Car Parking)နှင့် ကျောင်းခြံစည်းရိုးစသည်နေရာဌာန တို့ကို ဩစတေးလျနိုင်ငံ၏ စည်းမျည်းစည်းကမ်းများနှင့်အညီ ဆောက်လုပ်ကြရန်ဆောင်ရွက်နေကြပြီဖြစ်ပါတယ်။နိုင်ငံရပ်ခြားတွင် ကျောင်းတစ်ကျောင်း ရိပ်သာတစ်ခုဖြစ်ဖို့ရန် လွန်စွာအားစိုက်ကြိုးစားကြရပါတယ်။ ကံကြီး ဉာဏ်ကြီးသူ ဒကာဒကာမများ၏ထောက်ပံ့မှု၊ သာသနာ့ဒါယကာ ဒါယိကာများ၏ ကူညီပံ့ပိုးမှုများဖြင့်သာ ဤမျှကြီးမားသော (6 Million Project) စီမံကိန်းကြီးပြီးစီးအောင်ဆောင်ရွက်နိုင်မှာဖြစ်ပါတယ်။

ပထမဦးစားပေးစီမံကိန်း – ဓမ္မာရုံတော်ကြီး

ဒကာဒကာမများ မကြာခဏဖုန်းဆက်မေးမြန်းကြတာကတော့ တရားအားထုတ်ဖို့အဆင်ပြေနိုင်မယ့် ဓမ္မာရုံတစ်ခုပါ။ ဒါကြောင့် ပထမဦးစားပေးအနေနဲ့ ခန့်မှန်းကုန်ကျစရိတ် (1.6 Million) ကုန်ကျနိုင်မယ့် ဓမ္မာရုံတော်ကြီးကို ပထမဦးစားပေးအနေနဲ့ ထည့်သွင်းတည်ဆောက်သွားမှာဖြစ်ပါတယ်။

ဒုတိယဦးစားပေးစီမံကိန်း – ယာဉ်ရပ်နားစခန်း

ဩစတေးလျမှာ အဆောက်အဦးတစ်ခုတည်ဆောက်လျှင် ကားပါကင်ပါထည့်သွင်းပြုလုပ်မှ အဆိုပါအဆောက်အဦးကို အသုံးပြုခွင့်ပေးပါတယ်။ ဒါကြောင့် သာသနာ့ရိပ်သာသို့ လာရောက်ကြမည့် ဒကာ ဒကာမများလည်းအဆင်ပြေအောင် ခန့်မှန်းခြေ (ဩစတေးလျ‌ဒေါ်လာ ၈သိန်းခန့်) ကုန်ကျမည့် ကားရပ်နားစခန်း (Car Parking) တစ်ခုကို ဒုတိယဦးစားပေးအနေနဲ့ တည်ဆောက်သွားဖို့ရှိပါတယ်။

တတိယဦးစားပေးစီမံကိန်း – ဆွမ်းစားဆောင်

တတိယဦးစားပေးအနေနဲ့ကတော့ အမျိုးသမီးယောဂီများပါနေထိုင်နိုင်မယ့် (ကုန်ကျစရိတ်ခန့်မှန်းခြေ 1.2 Million)ခန့်ရှိ ဆွမ်းစားဆောင်ကြီးတစ်ခုကို ထည့်သွင်းတည်ဆောက်သွားဖို့ လျာထားရှိပါတယ်။

စတုထ္ထဦးစားပေးစီမံကိန်း – မဟာသိမ်တော်ကြီး

သံဃကိစ္စအဝဝဆောင်ရွက်နိုင်ရန်အနေဖြင့် မဟာသိမ်တော်ကြီးကိုထည့်သွင်းတည်ဆောက်သွားဖို့ရှိပါတယ်။ မဟာသိမ်တော်ကြီးကတော့ ခန့်မှန်းခြေဩစတေးလျ‌ဒေါ်လာ ၄သိန်းခန့် ကျသင့်နိုင်ပါတယ်။ မြတ်ဗုဒ္ဓ၏ တရားတော်များတွင်လည်း သိမ်ရှိမှသာသနာတည်မည်ဟု အဆိုရှိပါသည်။ သိမ်ရှိမှ ရဟန်းခံကိစ္စ၊ သံဃကိစ္စဆောင်ရွက်နိုင်၍ သိမ်သည် သာသနာတည်စေကြောင်း သာသနာ့ဘူမိနက်သန်အောင်မြေဖြစ်ပါသည်။ ကမ္ဘာတည်နေသရွေ့သိမ်လည်း ရှိနေမည်ဖြစ်ပါတယ်။ ထို့ကြောင့် ဗုဒ္ဓဘာသာဝင်များအနေဖြင့် သိမ်ကိုလှူဒါန်းလိုကြခြင်းဖြစ်ပါသည်။ သိမ်လှူဒါန်းခြင်းက ကမ္ဘာတည်သရွေ့မိမိအလှူလည်းတည်ပါသည်။ထို့ကြောင့် နိုင်ငံရပ်ခြား သာသနာပြုလုပ်ငန်းတစ်ရပ်ဖြစ်သည့် ယခုအသစ်ဆောက်လုပ်နေသည့် ပဏ္ဍိတာရာမ ဆစ်ဒနီသာသနာ့ရိပ်သာစီမံကိန်းတွင် ကုသိုလ်ယူပါဝင်လှူဒါန်းခြင်းဖြင့် သာသနာ့ဒါယကာ သာသနာ့ဒါယိကာမများအဖြစ် ခံယူနိုင်ကြပါစေသော်ဝ်။